In sei libri/albomi, un libru ducumentu è un fugliale individuale d’attività, vi hè prupostu quì un metudu d’amparera di u leghje/scrive in duie lingue, u francese è u corsu. 

Sta pruduzzione, uriginale assai, si vole nuvatrice à omancu trè tituli :

- pà a prima volta, si mette in manu à i zitelli di i corsi priparatorii bislingui un metudu d’amparera di a littura è di a scrittura in le duie lingue chì danu a so curpuratura à u insignamentu bislinguu

- ùn si tratta propiu d’un « metudu » classicu d’amparera : truvarete invece un fasciu d’attrazzi pedagogichi chì, aduprati inseme, cuncorrenu tutti quanti à fà nasce inde u scularu u bisognu d’attività è u bisognu di scopre è di sapè ; sta pustura metudulogica, d’altronde, hè stata pinsata apposta chì ognunu a fessi soia spartenduci attempu una forma di cumunu è una intalpritazione didattica parsunale

- s’ampara à leghje è à scrive, è si face in duie lingue, di modu raziunale è strutturatu ma si scopre dinò, via via, u mondu, cù a primura di u spaziu, di u tempu, di u rispettu di l’Umanu in la so diversità è infine di l’ambiente, tinutu da bè universale, unicu è cumunu da prisirvà à tuttu pattu.

Sta pruduzzione currisponde à l’attese di i prugrama di u corsu priparatoriu in tarmini di sapè, di sapè fà è di sapè esse. Hè u stantu d’una squatra furmata da quattru prufissore di e scole di prima trinca, chì tutte assumedinu a scummessa appena scema tandu di u « corsu integratu », in l’annate uttanta. Hè dinò u spechju d’una bella cullabburazione cun dui prufiziunali d’altu intellettu, Jean Duverger, anzianu ispittore primariu è spizialistu di u insignamentu bi/plurilinguu, è Mireille Maladry, prufissora di e scole in Barcelona, chì principiò è purtò ella tanti anni sò quella magnifica prova di u insignamentu bislinguu è plurilinguu cù i so sculari di a scola primaria di u liceu francese di Barcelona.

Ch’elli sianu ringraziati tutti l’attori di sta bella mossa à prò di l’educazione bislingua è plurilingua, pegnu di cuncordia è di fratillanza in le nostre sucetà sottumesse à e scosse è à l’inforse di cambiamenti trimendi assai è cusì lestri.

Pasquale OTTAVI

Prufissore di l’università